Tuisenchhuah

Tuisenchhuah

Ropuia Ralte

December 17, 2014

A hming pawh ka hriat ngai reng reng loh khuaah hnâ avangin ka awm a ngai a. Ni 6.11.2014 khan Lunglei atangin hun eng emaw chen ka inkhuarna tur hmun chu ka pan ta a. Sumo-in kan kal a, Tlabung kawng kan zawh a, Phairuangkaiah kawng chhe lehzual zawh turin kan pêng a. Kilometre sawmriat kal chhûng a rei khawp mai. Darkar 6 vel kan insawh hnu chuan Tuisenchhuah khua chu kan thleng ve ta hlawl mai. Chhûngkuaa chên nân a va îtawm lo tak em tih ringawt mai chu ka rilru-ah a awm a. Mahse, mahni chauhvin kum tlêmte chauh ka awm turah ka ngai a, ka huphurh hran lo.

Tuisenchhuah, Google Earth

Hmelhriat pakhat mah ka nei lo va.  Han thlenna mai tur ka vân khawp mai. VCP hi khawi khuaah pawh mikhual baihvai thlengtu an ni thin tih chu ka lo hre ve tawh thin a, VCP inah chuan ka innghat ve ta chawt mai a. Tah chuan kâr ni 12 ka thleng ta a. Nimahsela, Dângpuithu leh Ajinomoto an ei nasat êm avangin chaw ei tlêmah ka tlâk leh ringawt thin. Chutiang rêng rênga tûkthuan leh zanriah han ei chu cher a awl dawnin ka hre ta a. Chhuanchhamin ka awm bik em nâng tiin ka indang ve ta a. Ka ngampa hma bawk a. Tuisenchhuah in zawng zawng chu kar khat chhung lekin ka tlawh chhuak vek a. Chumi pah chuan upa ve tawh tak nia ka hriat te hi an kawmtlak deuh chuan rei tak ka kawm thin a, an khaw chanchin leh khaw mipui chanchin theih ang angin ka zawt zel a. Chung ka zawh atanga ka hriat leh ka awmchilh atanga ka tawnhriatte fawmkhawmin ka awmna khaw chanchin tlem azawng ka han thai lang ange.

Tuisenchhuah, vêng mawng lam

Tuisenchhuah hi khaw upa tak a ni lo va. Tuisenchhuah khaw thenawm chiaha Bolia khua nen hian a hma chuan khaw khat an ni thin a ni awm e. Tuisenchhuah khaw chhak deuh hmun zo takah hian Belkhai khua a awm thin a, chu khua chu ram buai laia khaw khawm avang leh sipai hlauh avangin a khaw mi leh sâ tam zawkin an tlan chhiatsan tâ a. A tam zawk chu Tlabung lamah an tlanchhia a, thenkhat chu tuna Tuisenchhuahah hian an inkhuar tâ a ni. Chutia mipa leh hmeichhe han awmkhawm tâ chu rei lo têah an lo inthlahpung vê ta thuai a. Tunah meuh chuan in sawmruk leh pathum lai an lo kai ve ta a. Bolia lam phei chu in zâ leh sawmli vel lai an tling tawh. Belkhai khua chu Mizo hlang awm khawmna niin an sawi a, mahse an han pem darh hnu hian tuikuk lamin an rawn fin a, tunah phei chuan mizo dik tak an awm tawh mang lo. 

Bolia

Hriselna kawngah an hnufum em em a. Malaria vei an tam a, hritlang leh kawthalo pawh an tam hle. Bolia lamah phei chuan vawk an la tlattir a, khawlai hi kel ek leh vawkin a intial nian nuan mai a ni. Bolia lam hian Kau lui tui hi tlan berah an rin avangin an hrisel lo deuh a. Tuisen lam chuan lui te tui thianghlim tak kan tlan avangin kan hrisel deuh zawk a. In leh a chhehvel pawh kan tifai zawk bawk a ni.

Bolia tui tlan ber, kau Lui

Concrete building hmuh tur a awm lem lo va, in tam zawk hi chu hmanlai mizo in ang kha a la ni a, a chung atan dî an hmang a, a chhuatah dâp an hmang deuh vek a ni.  Kawtkai maia thing leh mau put tur a awm avang hian in rawp tawh thawm that vel a awl phian a. Mahse, chuti chung pawha a tluk hmâ chu luah ta'nge tî ni awm taka in âwn tawh tak taka awm te pawh an kat nawk mai.

Tuisen leh Bolia inkalpawhna lei

Khaw chengker ve tak leh hmasawnna thlen phak meuh lohna khua mah ni se khawpui nun inchawhchawrawi lutuk laka inthiarfihlim lailawk nana hmun thlannahawm tak chu a ni. Hmanlai nunphung ang kha a taka i hmuh duh chuan lo kal la; thlalak lama i tui a nih chuan lo kal bawk a; lui kal nuam ti mî i nih phei chuan lui kama awm kan ni a, sangha man tur pawh a la tam. In rawn kal duh phwt chuan zo takin thlen ka lo tum ang che u. Sâ phei chu ka hmehpui thei kher lo ang che u a, mahse, bekangsa zawng ka neih ve zawng tak a ni. Kan khuaah chuan "Tunge Pu Ropuia?" rawn ti ula, an lo hre vek mai ang :-D

Tuisenchhuah naupang

Home visit ka neihnaa naupang te nen :-)

Kau Lui

Ropuia Ralte December 17, 2014